Este álbum sen palabras invita a reflexionar sobre as relacións interxeracionais: avós, fillos e netos creceron en ‘mundos’ diferentes e baixo circunstancias cambiantes. Os xogos de antano, máis participativos, amables e humildes, tornaron en elementos que fomentan o individualismo, a competitividade e a violencia. Cando a súa precaria saúde o leva a afastarse da familia, o ancián deste relato quere legarlle ao seu neto o recordo máis tenro da súa nenez. Pero o monicreque que o acompañara dende neno e que ao longo de toda unha vida fora testemuña de excepción dos seus momentos máis felices, agora -e nas mans do seu neto- queda relegado a un recuncho apartado.